الحصاد 24

#طوينا_الصفحة

alt=
بقلم /عبدالله الرخا
هذا آخر سلامي ليك فغابة لهبال
آخر هضرة، ونطوي هاذ الصفحة
نكمل حسابات الحروف والكلام
ونعلق مدادي لي معاندني والورقة
*
مال الذل ولى فينا حجر
والهضرة قلالت أو تبدلات
كيف عيوط البراح لي راح وساح
بلا خيل مسرج بلا سراح
*
يا سيادي يا لي فالروح والگلب
يا لي فكفوفنا نشوفوهم صورة أو حرف
سولونا ها العار واش تخلطات گصعتنا،
فعرس خيال العمر؟
واش ولات فكرشنا العجينة بلا خميرة؟
*
شوفو بلا تعاويد فالهضرة
راه مبغينا نعيشو فالطنز
ما بغينا نكونو حيط قصير
لي جا يقطر شمعو علينا
ويسمعنا كلام المعنى
لي ما فينا
*
غير زيدو گلبوا عصيدتنا
لي مزالا سخونة
زيدو طفيو شمسنا
لي باقي مشعلات
وحتى الگمرة لي مضويا حياتنا
ونور عينينا
*
زيدو عرفو علاش سكن الليل
فالخفا بين كفوف يدينا
وفعروق جروح الحال
وبين ذيك غفلة الغدر
لي ملت من غواتي ومن مرايتي
ومن فتيلت وحدتنا
*
راني يا سيادي وسط حبابي
وسط ظلام مدفون
والفرحة فوجهي قلالت
خليني نكون بحال وقيدة تشعل
تشعل هاذ الظلام لي باقي
خليني نشعلني بحروف الصبر
خليني أنا ندوب فالماء ملح وسكار
*
ملي هجرت جوفك قبل
تخبلو لي هوايش الوقت
وحبال الهضرة وقفات
سكتات كيف مگانة العمر
وهربات بلا سباط
هربات بعيييييد
*
وااااا عوَّد يا عوااااد
خلي لحنك يطربنا
يسمعنا الكلام الرزين
هذا زمان خداع يرفع راس،
مول السيف والبندير
ومول الليل والنهار
والبحر ولوزين
*
وااااا عوَّد يا عواااد
خرجنا من هاذ القهر
من هموم الدنيا لي فيها غير رماد المجمر
لا حبيب عليه نسندوا،لا رفيق حنييين
مدينتنا يا خيي ما فيها ضو يشعل
حل عينيك أو شووووف مزياااان
شوف أحلامنا لي بين الوقت ضاعت
شوف بنت الناس لي بصح تقهرات
وشووووف….شووووف
عبد الله الرخا
Exit mobile version